Programm / Tourenberichte

Schneeschüele am 17.Dezämber vo Biberbrugg via St.Jost uf Rothenthurm i öppe drü Stund

D Saison isch eröffnet: -1 Grad, bedeckt, 10 cm Nöischnee, mängisch e chli Gägewind, Tierspure, also wie n im Märli. Di sächs nasegrossi Gruppe, aagfüert vo de Pia, isch föif Stund a de frische Luft gsy. übers Moor simer gschneeschüendlet. De Ufstieg uf St.Jost hät scho e paar Schweisstropfe gchostet, e chli Fett verbrännt und mis Härz hät poperet als seg ich frisch verliebt. Ohni Ychehre im "Chiläbeizli St. Jost" für öppis Flüssigs ischs nöd ggange. Messwy git's keine ! Die sehenswerti Kappelle St.Jost isch gschlosse gsy. So simer sehr motiviert s Loch ap. S Veh im Laufstall verusse hät öis wele begleite, hät öis aber nu chöne blöd nahglotze mit schöne, grosse, brune Auge. Schön brun? Wie de Teint vo de Elsbeth? Das chäm vom Zwätschgelutz hät si sälber gmeint. En herrliche Tag han i lachend gnosse - wer dihai blibe isch, isch sälber Schuld.

Nota bene: So suber putzti Wanderschue han i erst eimal gha: Won is gkauft ha.
 

Marcel Wildberger